Ég og umheimurinn 2913 | Kennsluleiðbeiningar | © Miðstöð menntunar og skólaþjónustu 2025 4 Til kennara Þessar kennsluleiðbeiningar fylgja námsefni í samfélagsgreinum sem fjallar um stórar spurningar sem varða jörðina og samfélagið okkar: Hvað er sanngjarnt? Hver bera ábyrgð á jörðinni? Hver eru réttindi barna og hvernig geta þau verið virt um allan heim? Efnið tengist málefnum sem eru hluti af daglegu lífi nemenda en ná einnig yfir atburði líðandi stundar. Þannig bjóða þau upp á samtöl um réttlæti, menningu, umhverfi og frið. Kennsluleiðbeiningarnar skiptast í sjö aðskilda kafla eins og námsefnið og eru ætlaðar kennurum til stuðnings við að leggja inn afmarkað efni hvers kafla. Námsefniskaflarnir eru sjálfstæðir og kennarar geta unnið með þá í þeirri röð sem hentar hópnum og samhengi námsins hverju sinni. Hver kafli kennsluleiðbeininganna hefst á texta sem miðar að því að gefa kennurum hugmyndir að því hvernig hægt er að vekja áhuga og tengja efniviðinn við reynsluheim nemenda. Því næst eru lykilhugtök skilgreind auk hugmynda að samræðum við nemendur í tengslum við hvern kafla. Tillögur fyrir kennara að innlögn og atriðum til að draga fram fyrir hvern undirkafla fylgja í kjölfarið ásamt hugmyndum að stuttum afmörkuðum verkefnum sem hægt er að leggja fyrir í kennslustundum. Verkefnin sem fylgja undirköflunum eru mismörg eftir atvikum en miða að því að vekja nemendur til umhugsunar með umræðum, skriflegri íhugun eða myndrænni tjáningu. Að lokum eru tiltekin stærri og ítarlegri verkefni fyrir hvern kafla sem ýta undir ígrundun, samvinnu og skapandi verkefnaskil. Kennarar eru hvattir til að útfæra verkefnin eftir því sem hentar og laga að sinni kennslu sem og að tengja þau öðrum námsgreinum á borð við í slensku, náttúrufræði, upplýsinga- og tæknimennt og list- og verkgreinum. Sérstök áhersla er lögð á að efnið styðji við grunnþætti menntunar í anda Aðalnámskrár grunnskóla, með áherslu á jafnrétti, lýðræði og mannréttindi, sjálfbæra þróun, heilbrigði og velferð, læsi og sköpun. Efnið hvetur nemendur til að velta fyrir sér eigin stöðu í heiminum og hvernig þeir geta haft áhrif.
RkJQdWJsaXNoZXIy MjIxNzc=