Eðlisfræði 1, 2 og 3 - Kennsluleiðbeiningar

Kennsluleiðbeiningar – Eðlisfræði 1 10 Inngangur Uppbygging kennslubókanna Námsefnið er þannig úr garði gert að það býður upp á mismunandi kennsluaðferðir og nálganir. Textanum er skipt í kafla sem eru nægilega sjálfstæðir til þess að kenna má þá hvern fyrir sig og í hvaða röð sem er. Eðlisfræðibækurnar þrjár skiptast í fjögur meginviðfangsefni hver og fær hvert viðfangsefni stóran kafla undir sig. Hver meginkafli skiptist síðan í mismarga undirkafla eða kaflahluta. Í Eðlisfræði 1 eru meginviðvangsefnin: 1. Rafmagn 2. Hljóð 3. Varmi og veður 4. Ljós Í Eðlisfræði 2 eru meginviðfangsefnin: 1. Kraftur og hreyfing 2. Þrýstingur 3. Rafmagn og segulmagn 4. Orka og afl Í Eðlisfræði 3 eru meginviðfangsefnin: 1. Kjarneðlisfræði 2. Orkuöflun mannkyns 3. Sólkerfið 4. Alheimurinn Eins og sjá má á þessum kaflaheitum má segja að orkuhugtakið gangi sem rauður þráður í gegnum allt efnið. Hægt er að nálgast efnið á fjölbreytilegan hátt í kennslu, allt eftir þeim áherslum sem lagðar eru í skólum um skipulag og námsframvindu. Bækurnar hefjast allar á lestrarráðum, þar sem nemendur fá góð ráð við lestur námsbókanna. Lestrarráð! Kæri nemandi Allir námsmenn þurfa að temja sér góðar námsvenjur. Hér eru góð ráð sem gætu hjálpað þér við lestur. Áður en þú byrjar lesturinn • Skoðaðu bókina vel, myndir, kort og gröf. • Lestu efnisyfirlit og kaflaheiti. • Um hvað fjallar bókin? • Hvað veist þú um efnið? Á meðan þú lest • Finndu aðalatriðin. • Skrifaðu hjá þér minnispunkta. • Gott er að gera skýringarmyndir eða hugarkort. • Spurðu um það sem þú skilur ekki, t.d. orð og orðasambönd. Eftir lesturinn • Rifjaðu upp það sem þú last. • Veltu fyrir þér hvað eru aðalatriði og hvaða atriði skipta minna máli. • Hugsaðu um það sem þú hefur lært og tengdu við það sem þú vissir áður. • Reyndu að endursegja textann með eigin orðum.