FJÖLSKYLDAN : ÞJÓÐFÉLAGSFRÆÐI 73 Hlutverk fjölskyldunnar Á Vesturlöndum virðist ástin ekki endast vel miðað við fjölda skilnaða. En fjölskyldan er samt nauðsynleg til að samfélagið geti haldið velli. Þess vegna er hún til í nánast öllum þekktum samfélögum, hvort sem þau eru háþróuð eða frumstæð. Fjölskyldan er einn af hornsteinum samfélagsins. En hvers vegna ætli það sé? Við tölum gjarnan um nokkur meginhlutverk sem fjölskyldan hefur og gera hana að þeim hornsteini samfélagsins sem hún er. Endurnýjun mannkyns. Ekkert samfélag getur haldið velli nema til sé kerfi sem tryggir að kynslóðirnar endurnýi sig. Endurnýjunin eða „framleiðsla“ nýrra einstaklinga fer einna helst fram innan fjölskyldunnar. Hún hefur sinnt verkefni æxlunar frá alda öðli og innan fjölskyldunnar eru einstaklingar með sérstaklega skilgreind foreldrahlutverk og ábyrgðina sem fylgir þeim. Reglur um kynlíf. Í öllum samfélögum heims eru til reglur sem segja til um hver má vera með hverjum og hverjir mega giftast. Hvergi í heiminum hafa einstaklingar algjörlega frjálsar hendur í samskiptum sínum við aðra. Lengi vel mátti kóngafólkið í Evrópu ekki giftast öðrum en þeim sem voru konungbornir og því var töluvert um skyldleikahjónabönd meðal þess. Í mörgum ríkjum eru lög sem banna mök við einstaklinga undir ákveðnum aldri. Annars staðar eru barnabrúðkaup enn við lýði og aldur brúðhjóna getur verið allt niður í fimm ár. Indland og Írak eru dæmi um ríki þar sem barnabrúðkaup tíðkast enn. Barnabrúðkaup á Indlandi. Brúðguminn er um þrítugt en brúðurin fimm ára.
RkJQdWJsaXNoZXIy MjIxNzc=