Markviss málörvun

20 Bilið brúað á milli leikskóla og grunnskóla Eins og fram kemur í formála hafa fjölmargar rannsóknir víða um lönd sannað að með því að þjálfa hljóðkerfisvitund barna má auðvelda þeim að læra að lesa. Í rannsókn Ingvars Lundbergs og samstarfsmanna hans kom í ljós að þjálfun í hljóðgreiningu dregur úr lestrar- og stafsetningarörðugleikum síðar meir. Í þeirri rannsókn var einnig sannað að hægt er að styrkja hljóðkerfisvitund barna án tengsla við formlega lestrarkennslu (sjá formála). Þar sem áætlunin Markviss málörvun styrkir málvitund barnanna og þjálfar þau hljóðfræðilega er mjög æskilegt að hún sé notuð markvisst bæði í leikskóla og grunnskóla. Með hljóðfræðilegri þjálfun barnanna er lagður grunnur að lestrarkennslunni og dregið úr lestrarörðugleikum síðar meir. Út er komin ný aðalnámskrá grunnskóla. Einnig er verið að semja uppeldis­ áætlun fyrir leikskóla sem mun fá heitið aðalnámskrá leikskóla. Í báðum þessum námskrám er lögð mikil áhersla á góða samvinnu milli leikskóla og grunnskóla. Áætlunin Markviss málörvun í leik og starfi er vel til þess fallin að brúa bilið og stuðla að góðri samvinnu milli skólastiganna. Rannsóknir hafa leitt í ljós, þar á meðal rannsókn Lundbergs og samstarfs­ manna hans, að nauðsynlegt er að fara reglulega í leikina í áætluninni og að farið sé eftir vissum starfsreglum til að árangur náist. Mikil áhersla er lögð á leik­ gleðina, aldrei má gleyma að börnin eru í leik, annars er hætt við því að þau missi móðinn. Hér er lagt til að fjórir fyrstu leikjaflokkarnir séu þjálfaðir markvisst í leikskóla, þ.e. hlustun, rím, setningar og orð og samstöfur, en forhljóð og hljóð séu þjálfuð í grunnskóla þar sem lestrarkennsla hefst. Grunnurinn undir lestrarkennslu er því lagður í leikskóla og haldið áfram að leggja hann í grunnskólanum jafnhliða formlegri lestrarkennslu. Hefjist kennsla í Markvissri málörvun þegar í leikskóla er æskilegt að kennarar í leikskóla og fyrstu bekkjum grunnskóla skiptist á upplýsingum og beri saman bækur sínar um hvað er tekið fyrir í leikskólanum og hvað í grunnskólanum og áætlanir gerðar samkvæmt því. Hér á eftir kemur tillaga að fjögurra mánaða starfsáætlun fyrir leikskóla og sjö mánaða áætlun fyrir 1. bekk sem framhald af kennslu leikskóla, auk þess fylgja tillögur að vikuáætlunum fyrir fjórar fyrstu vikurnar á báðum skólastigum.