Dægurspor

81 Mörgum var mjög í nöp við djass á þessum árum. Töldu hann ógna klassískri tónlist en einkum þó íslenskri menningu. Þá þótti sumum ekki fínt, að djassinn skyldi „runninn frá svertingjum“. Hallbjörg komst svo að orði í Alþýðublaðinu árið 1943: Djassinn er tónlist æskunnar og þar með framtíðarinnar. Dillandi hljómfall hans, sem sumir nefna tryllt og ósiðlegt, er hljómfall nútímans. Og því þá að ræna æskuna tónlist hennar? Alþýðublaðið 29. september 1943, bls. 6. INGIBJÖRG ÞORBERGS Ingibjörg Þorbergs fæddist í Reykjavík árið 1927. Hún lærði að spila á klarínett og útskrifaðist úr Tónlistarskólanum í Reykjavík árið 1952, fyrst allra klarínettleikara. Hún lék einnig á píanó og gítar. Hún söng í barnakór og fór að semja lög einungis níu ára gömul. Ingibjörg gerðist starfsmaður Ríkisútvarpsins og sá meðal annars um óskalagaþátt sjúklinga. Á þeim árum var einnig útvarpað óskalagaþætti sjómanna, Á frívaktinni og Lögum unga fólksins. Hlustendur sendu útvarpinu bréf þar sem beðið var um kveðju til einhverra vina eða kunningja. Kveðjunni átti síðan að fylgja ákveðið lag sem tiltekið var í bréfinu. Þessir þættir voru mjög vinsælir á sínum tíma og einn helsti vettvangur dægurtónlistar hér á landi. Um miðjan sjötta áratuginn kom bandarískur kór til Íslands. Tókust kynni með Ingibjörgu og kórfólkinu. Í kjölfarið var henni boðið til Bandaríkjanna. Þar kom hún fram í sjónvarpi og var mjög vel tekið. Hún vildi hins vegar ekki halda áfram á þeirri braut og hélt aftur til Íslands. Hún söng inn á vinsælar hljómplötur og samdi barnalög. Þar má nefna Aravísur og Grýlukvæði . Margir kannast einnig við lag hennar Hin fyrstu jól. Mörgum hefur þótt vænt um Ingibjörgu eins og gefur að skilja. Ónefndur aðdáandi komst svo að orði í bundnu máli: Og umhverfis þögnina í þanka mínum er þrefaldur hringur og utan við gluggann minn galar og tístir glaðlyndur snjótittlingur akkúrat sama óskalagið og Ingibjörg Þorbergs syngur. Ingibjörg Þorbergs var fyrst íslenskra kvenna til að syngja eigið lag inn á hljómplötu. Það var lagið Á morgun . Eftirstríðsárin á Íslandi